میٹا کی جانب سے آرٹی فیشل انٹیلی جنس (اے آئی) ٹیکنالوجی کی دوڑ میں برقرار رہنے اور صارفین کی انگیج منٹ بڑھانے کے لیے فیس بک میں نمایاں تبدیلیاں کی گئی ہیں۔
کمپنی کی جانب سے ایک بلاگ پوسٹ میں فیس بک کے لیے نئے اے آئی فیچرز متعارف کرانے کا اعلان کیا گیا۔
ان فیچرز کا مقصد فیس بک میں تفصیلات کو تلاش کرنے، مواد تیار کرنے اور دیگر افراد سے رابطوں کے اندز کو بدلنا ہے۔
اس میں سب سے بڑی تبدیلی اے آئی موڈ ہے۔
فیس بک کے اے آئی موڈ سے سوشل میڈیا نیٹ ورک میں سرچ کرنے کا طریقہ کار بدل جائے گا۔
اس فیچر میں میٹا اے آئی کو استعمال کرکے فیس بک کی پبلک پوسٹس سے آپ کے سوالات کے جوابات فراہم کیے جائیں گے۔
یعنی سرچ رزلٹس میں اسکرولنگ کرنے کی بجائے صارفین سادہ الفاظ میں ایک سوال پوچھیں گے اور اس سے متعلق جوابات کو دیکھ سکیں گے۔
ابھی یہ کہنا مشکل ہے کہ فیس بک کے اے آئی موڈ کے جوابات کس حد تک قابل اعتماد ہوں گے، کیونکہ اے آئی کی جانب سے عام صارفین کے مواد کی سمری تیار کی جائے گی۔
سرچ سے ہٹ کر فیس بک کی جانب سے نئے ایڈیٹنگ ٹولز کو بھی متعارف کرایا گیا ہے تاکہ صارفین ویڈیوز کو بہتر بناسکیں گے۔
ایک اور نیا فیس اے آئی پر مبنی فوٹو پری سیٹس کا ہے، جس سے صارفین اپنی شخصیت کو مختلف ملبوسات، ہیئر اسٹائلز اور دیگر میں دیکھ سکیں گے۔
خیال رہے کہ حالیہ مہینوں میں فیس بک میں متعدد اے آئی فیچرز متعارف کرائے گئے ہیں۔
مثال کے طور پر فروری 2026 میں فیس بک میں انیمیٹڈ پروفائلز فوٹوز کا فیچر متعارف کرایا گیا تھا جس سے آپ ساکت تصاویر کو نئی زندگی دے سکتے ہیں۔
