ایچ بی ایل پاکستان سپرلیگ (پی ایس ایل) 10 کے 26 ویں میچ میں کوئٹہ گلیڈی ایٹرز نے اسلام آباد یونائیٹڈ کو 109 رنز سے ہرادیا۔
راولپنڈی میں کھیلے گئے میچ میں اسلام آباد یونائیٹڈ نے ٹاس جیت کر پہلے فیلڈنگ کا فیصلہ کیا۔
کوئٹہ گلیڈی ایٹرز نے پہلےکھیلتے ہوئے مقررہ 20 اوور میں 3 وکٹوں کے نقصان پر 263 رنز بنائے۔
کوئٹہ گلیڈی ایٹرز کے بیٹر رائیلی روسو نے44گیندوں پر سنچری مکمل کی۔ روسو نے اننگز میں 6 چھکے اور 13 چوکے لگائے۔
پی ایس ایل میں رائیلی روسو کی یہ تیسری سنچری ہے۔ رائیلی روسو پی ایس ایل میں سب سےزیادہ سنچریاں بنانے والے غیرملکی کھلاڑی بن گئے ہیں۔
ان کے علاوہ حسن نواز نے 45 گیندوں پر ناقابل شکست 100 رنز بنائے۔ ان کی اننگز میں 9 چھکے اور 4 چوکے شامل تھے۔
اسلام آباد یونائیٹڈ کی جانب سے نسیم شاہ اور عماد وسیم نے ایک ایک وکٹ حاصل کی۔
264 رنز کے ہدف کے جواب میں اسلام آباد یونائیٹڈ کی ٹیم 19 اعشاریہ 3 اوورز میں 154 رنز پر ڈھیر ہوگئی۔
اسلام آباد یونائیٹڈ کی جانب سے عماد وسیم 56 اور بین ڈوارشوئس 31 رنز بنا کر نمایاں رہے۔
کوئٹہ کی جانب سے محمد عامر نے 3، ابرار احمد اور فہیم اشرف نے 2،2 وکٹیں حاصل کیں۔
میچ سے قبل اسٹیڈیم میں پاکستان کا قومی ترانہ بجایا گیا اور بھارتی حملوں کے نتیجے میں شہید ہونے والوں کی یاد میں ایک منٹ کی خاموشی بھی اختیار کی گئی۔
